ഇരുളും വെളിച്ചവും
1. ഇന്നലെ
ഒന്നുകിൽ വെറുതെ കിട്ടിയതാവും .
അല്ലെങ്കിൽ അടുത്ത തലമുറയോട് അത്രയ്ക്ക് വെറുപ്പായിരിക്കും .
അതുമല്ലെങ്കിൽ ഒന്നിനും കൊള്ളില്ല എന്ന് മനസ്സിൽ തീരുമാനിച്ചുറപ്പിച്ചിട്ടുണ്ടാകും.
അല്ലാതെ പണിയെടുത്തു ഉണ്ടാക്കിയ പറമ്പ് ആരും സർക്കാരിന് കൊടുക്കില്ല.
പറഞ്ഞു വന്നത് നമ്മുടെ ഓഫീസ് ഇരിക്കുന്ന ഭൂമിയുടെ കാര്യമാണ്.
ഇതു പണ്ട് ശ്മാശാനഭൂമിയായിരുന്നത്രെ.
ഈ അനാഥരെയും പകർച്ചവ്യാധിമൂലം മരിച്ചവരെയും സംസ്കരിച്ചിരുന്ന ഭൂമി. രാജകുടുംബങ്ങളുടെ നടുത്തളത്തിൽ നിന്നും അധികാരം ജനങ്ങളുടെ വിരൽത്തുമ്പിലേക്കു കാലം പതിച്ചു കൊടുത്തശേഷം വർഷങ്ങളായി ഉപയോഗമില്ലാതെ കിടന്ന ഭൂമിയിൽ കാലക്രമേണ സർക്കാർ ഓഫീസ് ഉയർന്നു വന്നു.
മത്തായിസാർ നല്ല മൂഡിൽ പറഞ്ഞു കൊണ്ടിരിക്കുകയാണ്.
ഇന്നലെ വൈകീട്ട് ഓഫീസ് സമയം കഴിഞ്ഞും കണക്കുമായി കുത്തിയിരുന്ന സാറോട് ജനലിലൂടെ ആരോ ചോദിച്ചുവത്രെ.
"മത്തായി .. ജോലി കഴിഞ്ഞില്ലേ " എന്ന് .
"അത് ആരാന്നാ വിചാരം " സർ വിടുന്ന മട്ടില്ല.
ഈ ശ്മാശാനഭൂമി കഥയൊന്നും അറിയാത്ത ഞാൻ ചോദിച്ചു .."ആരാ"
"ആ ...അപ്പൊ അറിയില്ല അല്ലെ "
"ഈ പറമ്പിനു ഒരു ചരിത്രമുണ്ട് "
സർ പറയാൻ തുടങ്ങി.
വിശ്വാസമില്ലെങ്കിലും പ്രേതസിനിമകൾ കണ്ടാൽ പിന്നെ കുറച്ചു നാൾ മനസ്സിൽ ചെറിയൊരു പേടി കൊണ്ട് നടക്കുന്ന ഞാൻ കേട്ടിരുന്നു.
"ഇപ്പോഴും ഗതികിട്ടാതെ ചില ആത്മാക്കൾ രാത്രി ഇവിടെ കറങ്ങി നടക്കുന്നുണ്ട് ."
കേട്ടിരുന്നപ്പോൾ, ഇന്നലെ ജനലിനു പുറത്തു നിന്ന് ചോദിച്ചത് ഏതോ ആത്മാവാണെന്നു സർ വിശ്വസിക്കുന്നു എന്ന് എനിക്ക് തോന്നി.
പക്ഷേ അടുത്ത നിമിഷം ചിരിച്ചുകൊണ്ട് സർ പറഞ്ഞു.
"ജോജി, ഞാൻ ഇതിലൊന്നും വിശ്വാസമില്ലാത്ത ആളാണെട്ടോ"
അത് കേട്ടപ്പോൾ എനിക്കായി സംശയം. ഒരു മാതിരി ലക്ക് കെട്ടമാതിരി ഇയാളെന്തു തേങ്ങയാ ഈ പറയുന്നത്. ദുഷ്ടൻ എന്നെ പേടിപ്പിക്കാൻ നോക്കുകയാണോ .
വൈകിട്ട് ഓഫീസ് സമയം കഴിഞ്ഞു ഇയാൾക്ക് കൂട്ട് ഇരുന്നത് അബദ്ധമായോ.
"വാ ...മതി .. നമുക്ക് പോകാം". ഞാൻ എഴുന്നേറ്റു.
"ബാക്കി നാളെ ചെയ്യാല്ലേ ..." എന്നും പറഞ്ഞു സാറും എഴുന്നേറ്റു.
"അല്ല ജോജി ... നാളെ ഓഡിറ്റ്കാർ വരും എന്നാ പറഞ്ഞിരിക്കുന്നത്. പോസ്റ്റിങ്ങ് ചെയ്തു കഴിഞ്ഞിട്ടുമില്ല." ഇരുന്നിടത്തു നിന്ന് എഴുന്നേറ്റ് സർ പറഞ്ഞു.
"അതൊന്നും കുഴപ്പമില്ല, എത്ര ദിവസമായി സർ ഈ വൈകീട്ട് വീട്ടിൽപ്പോകാതെ ഇവിടെ ഇരുന്നു പണിയെടുക്കുന്നു. അവരെന്താ മനുഷ്യരല്ലേ.. പറഞ്ഞാൽ മനസിലാവില്ലേ " . ചീത്ത പറഞ്ഞാൽ അയാളെയല്ലേ .. നന്നാകും.. എന്ന് മനസിൽ ഓർത്തു ഞാൻ രംഗം ചുടാക്കി.
പക്ഷെ... മനസ്സിലിരിപ്പ് എൻ്റെ മുഖത്തുനിന്നും മനസിലാക്കിയപോലെ മത്തായിസർ അവിടെ തന്നെ ഇരുന്നിട്ട് പറഞ്ഞു .. " എന്നെ ചീത്ത പറയുന്നത് കേൾക്കാനല്ലേ .. വേണ്ട.. ജോജി പൊയ്ക്കൊള്ളൂ. ഞാൻ കുറച്ചൂടെ ഇരുന്ന് ഇതു തീർത്തിട്ട് വരാം.
"എന്നാ ശരി .. ഞാൻ പോണ് " ഉള്ളിരിപ്പ് മനസിലാക്കിയ ജാള്യത മറക്കുവാൻ ശ്രമിച്ചുകൊണ്ട് ഞാൻ ഓഫീസിൽ നിന്നും ഇറങ്ങി .
മൂന്ന് നാല് സർക്കാർ കെട്ടിടങ്ങൾ ഇരിക്കുന്ന ആ കോംപൗണ്ടിൻ്റെ ഏറ്റവും അകത്താണ് ഞങ്ങളുടെ ഓഫീസ്. ഞാൻ അവിടെ നിന്നും ഇറങ്ങി മറ്റു കെട്ടിടങ്ങളുടെ മുൻപിലൂടെ മെയിൻ ഗേറ്റിലെത്തിയപ്പോൾ വാച്ച്മാൻ ചോദിച്ചു "സർ ഇറങ്ങിയില്ലേ ? "
"ഇല്ല . കുറച്ചു കൂടി കഴിഞ്ഞേ പുള്ളി ഇറങ്ങു " ഞാൻ അതും പറഞ്ഞു റോഡിലേക്കിറങ്ങി.
2. ഇന്ന്
ഒൻപതു മണിക്ക് മുൻപ് ചീഫ് ഓഫിസിലേക്കു ഇന്നലത്തെ ഡാറ്റ മെയിൽ ചെയ്യാനായി ധൃതിയിൽ പോകുമ്പോഴാണ് വാച്ച്മാൻ സജീവ് പുറകിൽ നിന്നും വിളിച്ചത് .
"ആ ....എന്താ... 8 മണി കഴിഞ്ഞേല്ലോ .... ഡ്യൂട്ടി കഴിഞ്ഞാ വീട്ടിപ്പൊയ്ക്കൂടെ " എന്ന എന്റെ ചോദ്യത്തിന് മറുപടിയായി സജീവ് പറഞ്ഞു ." എൻ്റെ സാറേ ...ഇന്നലെയാ മത്തായിസാർ മനുഷ്യനെ പേടിപ്പിച്ചു കളഞ്ഞില്ലേ ..."
"ഉം...എന്തായി ?" ഞാൻ ചോദ്യഭാവത്തിൽ തിരിഞ്ഞു നിന്നു .
"രാത്രി എട്ടു മണിക്ക് കറന്റ് പോയിരുന്നു. സാർ അതുവരെ പോയിട്ടുണ്ടായിരുന്നില്ല. ഞാൻ ടോർച് അടിച്ചു ചെന്നപ്പോഴേക്കും കറന്റ് വന്നു. അവിടെ ചെന്നപ്പോഴുണ്ട് മുൻപിലെ ആ സോഫായില്ലേ ?... അതിൽ മലന്നു കിടക്കുന്നു സാർ. ... ഞാൻ ചെന്ന് കുലുക്കി വിളിച്ചപ്പോ മയക്കം വിട്ടു എഴുന്നേറ്റു. നോക്കിയപ്പോ നെറ്റിയിൽ ചോര."
"എന്നിട്ട് " ഞാൻ ചോദിച്ചു .
എടോ എന്നെയാരോ തലക്കടിച്ചു .. ക്യാഷ് ഒക്കെ കൊണ്ടുപോയെന്നാ തോന്നുന്നത് എന്നും പറഞ്ഞു പോലീസിനെ വിളിക്കാൻ പറഞ്ഞു സർ അവിടെ തന്നെ ഇരിക്കണേണ്, നെറ്റിയിന്നാണെ ചോരയും ഒഴുകണ് .ഞാൻ പോയി വേഗം മുറിയിൽ വന്നു ബാൻഡ് ഐഡ് എടുത്തു സാറിന്റെ തലയിൽ കെട്ടി . അപ്പോഴും പുള്ളി പോലീസിനെ വിളി പോലീസിനെ വിളി എന്നും പറഞ്ഞു ബഹളമാണ് .
"എൻ്റെ ദൈവമേ ... എന്നിട്ട് "
"ഞാൻ പറഞ്ഞു...... വിളിക്കാം . ആദ്യം പൈസ പോയെന്നു നോക്കാം . എന്നിട്ടു പുള്ളിയെ താങ്ങിപിടിച്ചു അകത്തു കൊണ്ടുപോയി അലമാര തുറന്നു നോക്കിയപ്പോ പൈസയൊക്ക അവിടെ തന്നെ ഇരിപ്പുണ്ട് ." സജീവ് പറഞ്ഞു നിർത്തി
"ങേ ... അപ്പ തലക്കടിച്ചിട്ടു പൈസ ഒന്നും എടുത്തില്ല " എന്നായി ഞാൻ .
"അതല്ലേ രസം .. മുറിയിൽ ഒരു സാധനവും ഒന്നും അനങ്ങിയിട്ടില്ല .."
"എന്നിട്ടു പോലീസിനെ വിളിച്ചോ "
"ഇല്ല ....എന്തിന് ....വെറുതെ അവരെ വിളിച്ചിട്ടു അവരുടെ ചീത്ത കൂടി കേൾക്കാനോ "
"അപ്പൊ ആരാ തലക്കടിച്ചത് ?" എൻ്റെ സംശയം തീരുന്നില്ല ...
"തലക്കടി .. മണ്ണാങ്കട്ട ... അയാൾക്ക് പ്രാന്താണ് ...വെറുതെ പറയിപ്പിക്കാൻ .. അയാൾ ഓടി വന്നപ്പോ തല പോയി ഗ്രില്ലിൽ ഇടിച്ചതാണ് .. എന്നിട്ടു ഓരോ പിച്ചും പേയും പറയുകയാണ് .." ഉറക്കച്ചടവും ക്ഷീണവും സജീവിന്റെ ദേഷ്യം കൂട്ടി .
"അല്ല മുറിയിൽ നിന്നിറങ്ങുമ്പോൾ ഗ്രില്ലിൽ തല മുട്ടില്ലല്ലോ. ഇതു വരെ ആരുടെയും തല മുട്ടിയിട്ടില്ലല്ലോ." എന്നിലെ കുറ്റാന്വേഷകൻ ഉണർന്നു . സാഹചര്യ തെളിവ് വെച്ച് ഇനി തലക്കടിച്ചതു സജീവ് ആകുമോ .. ഞാൻ സേതുരാമയ്യരായി കൈ പുറകിൽ കെട്ടി ആലോചിക്കാൻ തുടങ്ങി ..
“"ജോജി വന്നേ ഞാൻ കാണിച്ചു തരാം " എന്ന് പറഞ്ഞു സജീവ് മുൻപിൽ നടന്നു. പിറകെ ഞാനും .. കൈകൾ പുറകിൽ ചേർത്ത് പിടിച്ചാണ് എൻ്റെ നടപ്പ് .
ഗ്രില്ലും ഓഫീസ് മുറിയും തുറന്ന് സജീവ് എന്നെ വിളിച്ചു . "ജോജി ഒന്ന് ഓഫീസിൽ നിന്നും ഓടി ഇറങ്ങിയേ "
പുല്ല് .. രാവിലെ തന്നെ മനുഷ്യനെ ഓടിക്കാൻ ഉള്ള പരിപാടിയാണോ . "താൻ ഓടി കാണിച്ചാൽ മതി .."
"അല്ല .. ഒരു കാര്യം ഉണ്ട് .. ഒന്ന് ഇറങ്ങി നോക്ക് " എന്നായി സജീവ് .
ഞാൻ ബാഗ് സോഫയിൽ വച്ച് ഓഫീസിൽ കയറി ഒന്ന് പയ്യെ ഓടി പുറത്തേക്ക് ഇറങ്ങി.
"ഇല്ല ല്ലോ . ഒന്നും മുട്ടുന്നില്ല.. അതല്ലേ പറഞ്ഞത് .."
" ജോജി അങ്ങിനെയല്ല .. ഇരുട്ടത്തു പേടിച്ചോടുമ്പോൾ ദേ കൈ ദേ ദിങ്ങനെ വാതിലിന്റെ മതിലിൽ പിടിച്ചു കറങ്ങിയാവും ഓടിയിട്ടുണ്ടാവുക ..പോരാത്തതിന് ഉറക്കത്തിൽ നിന്നും എണീറ്റു ഓടുമ്പോൾ. അപ്പൊ മതിലിൽ നിന്നും അകന്നു ഈ സൈഡിലെ ഗ്രില്ലിൻ്റെ മൂലയിൽ പോയി തല ഇടിച്ചിട്ടുണ്ടാകും .. അതാണ്. കണ്ടാ.." സജീവ് എന്നെ സംഭവം നടന്നത് എങ്ങിനെ എന്ന് മനസിലാക്കി തരുവാനുള്ള ശ്രമത്തിൽ ആണ് .. വീണ്ടും വീണ്ടും കൈ മതിലിൽ പിടിച്ചു കറങ്ങി ഇറങ്ങി തല എതിർ സൈഡിലെ ഗ്രില്ലിൽ മുട്ടിക്കുവാനുള്ള ശ്രമത്തിലാണ്.
"പക്ഷെ അപ്പോഴും തൻ്റെ തല മുട്ടുന്നില്ലല്ലോ .. ഗ്രിൽ ...അതിനിയും രണ്ടു ഇഞ്ചു മുകളിലാണ് .." ഞാൻ വീണ്ടും കൈ പുറകിൽ കെട്ടി .
"എഡോ .. അതിനു ഞാനോ താനോ അല്ല ഓടി ഇറങ്ങിയത് ... മത്തായി സാറാണ് . ആറടി ഒരിഞ്ചു ആണയാൾ"
അത് കേട്ടതോടെ പുറകിൽ കെട്ടിയിരുന്ന എൻ്റെ കൈകൾ വേർപെട്ടു .
"ആ ഏതായാലും സർ വരട്ടെ .. നേരത്തെ വരാമെന്നു പറഞ്ഞാ പോയത് ".. സജീവ് പോകാതെ സോഫയിൽ ഇരുന്നു .
ഞാൻ ഓഫീസിൽ അകത്തു കയറി കമ്പ്യൂട്ടർ ഓൺ ആക്കി .. അപ്പോഴേക്കും മത്തായി സാറിൻ്റെ ശബ്ദം പുറത്തു കേട്ടു ഞാൻ പുറത്തിറങ്ങി.
" എന്താ സർ ഇന്നലെ .... ?"
"ഒന്നും പറയണ്ട ജോജി .." സർ വന്നപാടെ സോഫയിൽ ഇരുന്നു സജീവിന്റെ ചുമലിൽ പിടിച്ചു കൊണ്ട് പറഞ്ഞു.. "ഡ്യൂട്ടി കഴിഞ്ഞതല്ലേ.... സജീവ് പൊയ്ക്കോളൂ. എനിക്ക് കുഴപ്പമൊന്നുമില്ല. ഇന്നലെ പറഞ്ഞ പോലെ ഞാൻ ഓടി വന്നപ്പോ തല പോയി ഇടിച്ചതാകും.
"ഓരോരോ കാര്യങ്ങളേയ്...." എന്നും പറഞ്ഞു സർ ഒരു ചെറിയ ചിരിയും ചിരിച്ചു തല അങ്ങോട്ടും എങ്ങോട്ടു വെട്ടിച്ചു മുകളിലേക്ക് നോക്കിയിരുന്നു ..
"എന്നാ സർ ഞാൻ പോണു .. മുറിവു കുഴപ്പമൊന്നുമില്ലല്ലോ " എന്ന് ചോദിച്ചു സജീവ് ഇറങ്ങി ..
" ഇല്ലാ.. പൊയ്ക്കോ " എന്ന് സജീവിനോട് ചിരിച്ചു കൊണ്ട് പറഞ്ഞു കൊണ്ട് സർ എഴുന്നേറ്റു ഓഫീസ് മുറിയിൽ കയറി സീറ്റിൽ ഇരുന്നു .
തലേന്നത്തെ ഡീറ്റെയിൽസ് എടുത്തു മേശപ്പുറത്തു വച്ച് കംപ്യൂട്ടറിൽ നെറ്റ് വരാൻ കാത്തിരിക്കുന്നതിനിടയിൽ ഞാൻ ചോദിച്ചു " എന്നാലും സാറേ ... എന്തൊക്കെയാണിത് ...അല്ല ശരിക്കും എന്താ ഉണ്ടായത് "
"ഇന്നലെ ജോജി പോയില്ലേ... അത് കഴിഞ്ഞു ഞാൻ ഒന്ന് മയങ്ങിപ്പോയി .. പെട്ടെന്ന് ജോജി ഇരിക്കുന്നതിൻ്റെ പുറകിലെ ജനലിൻ്റെ അപ്പുറത്തു നിന്നും ആരോ എന്നെ പേര് വിളിക്കുന്നതു കേട്ടു ഞാൻ എഴുന്നേറ്റു. കണ്ണ് തുറന്നപ്പോ കൂരിരുട്ട് . ഞാൻ പെട്ടെന്ന് പുറത്തേക്കിറങ്ങി. പിന്നെ എനിക്കൊന്നും ഓർമയില്ല . സജീവ് വിളിച്ചപ്പോഴാ പിന്നെ എനിക്ക് ഓർമ്മ വന്നത് .
സർ ചൂണ്ടി കാണിച്ച എനിക്ക് പുറകിലെ ജനലിലേക്കു ഞാൻ നോക്കിയില്ല. ഞാൻ കമ്പ്യൂട്ടറിലേക്ക് നോക്കിയിരുന്നു .
Comments